شنو داك الاجسام لي كنشوفو فوق عينينا ؟ واش خطر ؟

 

 شنو داك الاجسام لي كنشوفو فوق عينينا ؟ واش خطر ؟

 

بلا شك ان اغلبيتنا الا ما قلنا كلنا، شفنا شي اجسام غريبة و شفافة فوق عينينا او على شكل خيوط و خواتم ولو مرة في حياتنا، و كاتبقى كاتجيب ليك شك بزاف شنو داكشي لي كايبان ليك و لكن ماكاتعرفش الجواب ولا تفسروا.

هاد الاجسام سميتهم "عوائم العين" كاتكون في الجسم الزجاجي للعين (و هو نقدرو نقولو عليه سائل هلامي كايتواجد داخل العين و هو اللي واخد الحجم الاكبر فيه)، هاد الاجسام تقدر تكون خيوط او بقع او بحال خيوط د العنكبوت او خواتم و دوائر او اجسام غير منتظمة، بعض المرات كاتكون في اللون الاسود و بعض المرات في اللون الرمادي، و هاد الاسجام كاتعوم و كاتحرك كلما حركتي عينيك، و كاتبقى تبعد كلما حاولتي تركز فيهم، و ماكاتدخلش في المجال د النظر ديالك.

الاسباب ديال ظهور هاد الاجسام، احيانا بسبب واحد البروتين سميتو الكولاجين، حينت اغلب دوك الاجسم مكونين من داك البروتين و اللي منو متكون الجسم الزجاجي، هاد البروتين متواجد في الجسم الزجاجي. كلما كاتقدم في العمر، دوك الالياف البروتينية كاتقلص، و كاتجمع مع بعضها البعض، و فاش كايضرب الضوء على عينيك، كايبانو الظلال ديال داك التجمع، و كايعطيو واحد الشكل معين و اللي سميناهم "عوائم العين"، تقدر تشوف هاد العوائم مزيان الا كنتي كاتشوف شي صورة صافية و ساطعة، بحال السماء، او شي ورقة بيضاء...

بعض الاحيان كايبان مضبب، بمعنى اخر، انه كتلقى بعض البلايص في العين مضببة و بلايص اخرى لا، هنا كاينة احتمالية ان داك الجسم الزجاجي كايبعد على الشبكية، و هاد الامر كايخصو الطبيب.

هاد العوائم كايكونوا بزاف للناس الكبار مورا 60 عام، و الا كان كايبان ليك ديما و بعدد كبير و مزعج، فكنصحوك بزيارة شي طبيب، حينت تقدر تكون كعلامة لشي مرض مثلا، لدرجة تكون فقدان البصر لي ما عندهاش علاج.

العوائم ماكايتمنعوش، و لكن كاينة طرق وقائية باش تحمي عينيك مايوقعش ليهم مشكل، بحال تلبس النظارات الشمسية الا كنتي خارج، او تلبس النظارات الوقائية في الحالات الضرورية بحال استخدام الهاتف

 

ولا الحاسوب، او فشي عمل، تريح عينيك مزيان، تاكل اطعمة لي تقدر تنفع عينيك، اقلاع عن التدخين.